Бандарэвіч Васіль Віктаравіч нарадзіўся 24 чэрвеня 1955 года ў вёсцы Новая Беліца Сенненскага раёна ў сям'і служачага. Бацька, Віктар Васільевіч, працаваў у раённым статыстычным упраўленні бухгалтарам, маці, Вольга Аўрамаўна, — медыцынскі работнік (загадчыца аптэкі ў в. Старая Беліца). Неўзабаве сям'я пераехала ў г. Сянно. 3 1962 па 1972 год вучыўся ў СШ № 2 г. Сянно, пасля яе заканчэння паступіў у Віцебскі педагагічны інстытут імя С. М. Кірава на мастацка-графічны факультэт, які скончыў у 1978 годзе. Працоўную біяграфію пачаў настаўнікам выяўленчага мастацтва і працоўнага навучання ў СШ № 2 г. Сянно, дзе працуе і цяпер. Чалавек, жыццё якога цяжка ўявіць без двух апанаваўшых яго захапленняў — мастацтва і краязнаўства. Нястомная праца энтузіяста на сумежжы гэтых сфер духоўнасці дае вельмі плённыя вынікі. Краязнаўствам зацікавіўся вельмі даўно, яшчэ будучы студэнтам. Але сістэматычна займацца гэтым пачаў тады, калі стаў працаваць настаўнікам СШ № 2 г. Сянно і ўдзельнічаць у краязнаўчых экспедыцыях адцзела беларусазнаўства абласнога аб'яднання пазашкольнай работы з дзецьмі. Збіраючы па крупінках краязнаўчыя звесткі пра свой раён, В. В. Бандарэвіч стварыў некалькі галерэй мастацкіх твораў на тэму архітэктурнай і культурнай спадчыны Сенненшчыны. Большасць гэтых прац упрыгожвае інтэр'еры краязнаўчага музея раённай і дзіцячай бібліятэк г. Сянно, вясковых бібліятэк Сенненскага раёна, а таксама абласных і рэспубліканскіх. В. В. Бандарэвіч мае шмат публікацый на тэму краязнаўства ў раённай газеце «Голас Сенненшчыны». У 1999 годзе ў абласным конкурсе на лепшае апісанне краязнаўчага маршруту па гарадах Беларусі яго публікацыя заняла першае месца, а на рэспубліканскім — другое. У 1995 годзе ў г. Віцебску прайшла персанальная выстава ма-стацкіх твораў «Васіль Бандарэвіч і яго вучні», якая працавала ў аб-ласным навукова-метадычным цэнтры народнай творчасці і культ-асветработы з 27 чэрвеня па 26 ліпеня. Бандарэвіч займаецца разьбой — коранепластыкай. Яго творы — мастацкія скарбонкі (дрэва, косць, разьба) «Вечаровая песня», «Заходняя Дзвіна», «Усяслаў» — экспанаваліся на рэспубліканскай выставе «Вечназялёнае дрэва Рамёстваў», Нацыянальнай выстаўцы народнай творчасці (чэрвень—верасень 1996 г., г. Мінск). Вынікам даўняй мары — эфектыўнага спалучэння выкладчыцкай дзейнасці ў школе з краязнаўствам — з'явілася распрацоўка аўтарскага вучэбнага курса «Спадчына роднага краю». Праграма курса ўтрымлівае ў сабе звесткі па геаграфіі, гісторыі, культуры Сенненшчыны і выкладаецца ў 6-х класах агульнаадукацыйнай школы № 2 г. Сянно. Займаецца настаўнік і музейнай працай. 3 першых дзён утварэння раённага краязнаўчага музея (1995 г.) у г. Сянно В. В. Бандарэвіч з'яўляецца яго навуковым супрацоўнікам. Пры музеі створана выставачная зала, дзе праходзяць шматлікія выставы талентаў зямлі Сенненскай. Аўтар прымае актыўны ўдзел ва ўсіх мерапрыемствах разам з выхаванцамі класаў з мастацкім ухілам. Гэта праца з'яўляецца вынікам шматгадовых краязнаўчых пошукаў аўтара і візітнай карткай для гасцей і землякоў г. Сянно і Сенненскага раёна.